Mae YesCymru ac AUOBCymru yn falch o gyhoeddi y bydd yr Orymdaith nesaf dros Annibyniaeth yn digwydd yn y Barri am 1pm ddydd Sadwrn, Ebrill 26, 2025.
Roedd y Barri yn ganolog ym mudiad Cymru Fydd yn yr 1890au, mudiad a oedd yn hyrwyddo ymreolaeth a hunanlywodraeth i Gymru. Ffurfiwyd cangen gyntaf Cymru Fydd yng Nghymru yng Nghapel Bethel, Tregatwg, ym 1892, ac enillodd aelodau Cymru Fydd seddi yn Etholiadau Cyngor cyntaf y Barri ym 1894.
Daeth Cymru Fydd i'r amlwg yn sgil yr awydd cynyddol ymhlith y Cymry am hunanlywodraeth. Ceisiodd y mudiad rymuso cymunedau drwy alw am rymoedd deddfwriaethol a fyddai'n caniatáu iddynt wneud penderfyniadau ar faterion allweddol fel addysg, masnachu, a seilwaith. Roedd yr angerdd dros ymreolaeth yn gryf ymhlith y boblogaeth, ac roedd y Barri ar flaen y gad yn y cyfnod trawsnewidiol hwn.
Dywedodd un o drefnwyr yr orymdaith, Mark Hooper, sy'n aelod o YesCymru ac yn gynghorydd lleol:
“Mae arwyddocâd hanesyddol Cymru Fydd yn y 1890au yn atgof pwerus o’n llais torfol. Wrth inni wynebu heriau cyfoes, mae’r syched am hunan-benderfyniad yn parhau mor gryf ag erioed. Mae’n hanfodol ein bod yn anrhydeddu ein gorffennol tra’n eiriol dros ddyfodol sy’n adlewyrchu ein gwerthoedd a’n blaenoriaethau.”
Ers 2019, mae miloedd wedi bod yn rhan o orymdeithiau dros annibyniaeth mewn trefi a dinasoedd ledled Cymru, gan gynnwys Caernarfon, Merthyr, Wrecsam, Bangor, Abertawe, Caerfyrddin a Chaerdydd. Denodd yr orymdaith yng Nghaerdydd yn 2022, er enghraifft, dros 10,000 o gyfranogwyr, y fwyaf ar gyfer yr achos hyd yma. Mae’r gorymdeithiau wedi dangos y gefnogaeth gynyddol i Gymru annibynnol, gan uno cymunedau o bob cwr o’r wlad sy'n rhannu'r un weledigaeth am hunan-benderfyniad.
Mae’r Orymdaith dros Annibyniaeth yn y Barri yn cael ei threfnu ar y cyd gan YesCymru ac AUOBCymru, dau fudiad llawr gwlad a arweinir gan wirfoddolwyr sydd wedi ymrwymo i sicrhau annibyniaeth i Gymru. Maent yn gwahodd cefnogwyr o bob rhan o’r wlad i ymuno â’r digwyddiad a bod yn rhan o’r symudiad cynyddol dros newid.
Dywedodd Phyl Griffiths, Cadeirydd YesCymru:
“Mae YesCymru wedi ymrwymo i’r nod o Gymru annibynnol, Cymru sy’n dathlu yr amrywiaeth o bobl sydd wedi ymgartrefu yma. Ymunwch â ni yn y Barri ar Ebrill 26, 2025, i leisio’ch barn a sefyll gyda miloedd o bobl eraill sy’n credu mewn dyfodol mwy disglair ac annibynnol i Gymru.”
Bydd rhagor o fanylion, gan gynnwys y llwybr a rhaglen y diwrnod, yn cael eu cyhoeddi yn yr wythnosau nesaf. Gall cefnogwyr gofrestru am ddiweddariadau neu i wirfoddoli drwy wefan YesCymru - www.yes.cymru - a’n dilyn ar y cyfryngau cymdeithasol – @yescymru ac @auobcymru – am y diweddaraf.