Ar ddydd Mawrth (8 Gorffennaf), fe wnaeth YesCymru gynnal digwyddiad egniol wrth y Senedd ym Mae Caerdydd i dynnu sylw at yr ymgyrch i drosglwyddo rheolaeth dros Ystad y Goron i Gymru.
Yn ystod y digwyddiad gwahoddwyd Aelodau o'r Senedd i arwyddo datganiad ffurfiol i ddatgan cefnogaeth i'r ymgyrch. Bu ymgyrchwyr yn dal baneri mawr dwyieithog yn dweud “Transfer the Crown Estate / Trosglwyddwch Ystad y Goron”, a defnyddiwyd chwibannau, drymiau ac offerynnau eraill i greu ton o sŵn ar gyfer pob llofnod.
Dywedodd Phyl Griffiths, Cadeirydd YesCymru:
Mae pobl Cymru yn glir - rydyn ni eisiau rheolaeth dros ein hadnoddau naturiol ein hunain. Mae trosglwyddo Ystad y Goron i Gymru yn gam hanfodol ar ein taith tuag at annibyniaeth.
Ychwanegodd Rob Hughes, un o Gyfarwyddwyr YesCymru a threfnydd y digwyddiad:
Ymgyrch yw hon i adeiladu cenedl hunangynhaliol sy'n barod i gymryd ei lle ar lwyfan y byd fel gwlad hyderus ac annibynnol.
Daw'r digwyddiad wrth i fomentwm dros ymgyrch Ystad y Goron gynyddu, a wedi i bob un o'r 22 awdurdod lleol yng Nghymru ddatgan eu cefnogaeth yn ffurfiol.
Yn ystod y digwyddiad arwyddodd 11 Aelod o'r Senedd ddatganiad ffurfiol o gefnogaeth - naw o Blaid Cymru a dau o'r Blaid Lafur. Dros yr wythnosau nesaf bydd YesCymru yn gwahodd aelodau eraill y Senedd i ychwanegu eu henwau. Bydd rhest yn cael ei chyhoeddi a'i diweddari ar wefan YesCymru.
Mae'r datganiad yn nodi:
“We, the undersigned, support transferring control of the Crown Estate to Wales.”
Mae'r rhai a arwyddodd yn y digwyddiad yn cynnwys:
- Adam Price MS (Plaid Cymru)
- Carolyn Thomas MS (Llafur)
- Cefin Campbell MS (Plaid Cymru)
- Heledd Fychan MS (Plaid Cymru)
- John Griffiths MS (Llafur)
- Llŷr Gruffydd MS (Plaid Cymru)
- Luke Fletcher MS (Plaid Cymru)
- Mabon ap Gwynfor MS (Plaid Cymru)
- Peredur Owen Griffiths MS (Plaid Cymru)
- Rhun ap Iorwerth MS (Plaid Cymru)
- Sioned Williams MS (Plaid Cymru)
