Bydd Y Rhyl yn ganolog yn yr ymgyrch dros annibyniaeth yr hydref hwn, gyda disgwyl i filoedd ymuno â'r Orymdaith nesaf dros Annibyniaeth ar ddydd Sadwrn 18 Hydref 2025. Bydd y digwyddiad, a drefnir gan YesCymru ac AUOBCymru (Pawb Dan Un Faner), yn gweld pobl o bob cwr o Gymru yn uno i gefnogi dyfodol annibynnol.
Cliciwch yma am yr holl wybodaeth am Orymdaith Annibyniaeth Y Rhyl.
Ers 2019, mae miloedd wedi cymryd rhan mewn gorymdeithiau annibyniaeth mewn trefi a dinasoedd ledled Cymru, gyda dros 6,000 o bobl yn gorymdeithio yn yr orymdaith ddiweddaraf yn Y Barri ym mis Ebrill. Mae'r gorymdeithiau hyn wedi dangos bod momentwm cynyddol dros annibyniaeth i Gymru ac wedi dod â chymunedau o bob rhan o'r wlad ynghyd i alw am Gymru annibynnol.
Dywedodd Bleddyn Williams, preswylydd lleol o’r Rhuddlan ac un o'r trefnwyr:
Mae cymunedau fel Y Rhyl wedi cael eu hanwybyddu a'u gadael ar ôl gan lywodraethau o bob lliw yn San Steffan am lawer yn rhy hir. Mae'r orymdaith hon yn ymwneud â dangos bod pobl sy’n byw yma ar arfordir y gogledd - ac ar draws Cymru - eisiau newid. Mae annibyniaeth yn cynnig y cyfle inni adeiladu Cymru decach, lle mae penderfyniadau am ein heconomi, ein hadnoddau a'n dyfodol yn cael eu gwneud yma yng Nghymru, nid yn Llundain.
Ystad y Goron yn Amlygu Methiant San Steffan
Bydd yr Orymdaith dros Annibyniaeth yn Y Rhyl yn mynd trwy un o wardiau etholaethol mwyaf difreintiedig Cymru, ardal sydd wedi dioddef degawdau o ddirywiad economaidd, tanfuddsoddi cronig, a diffyg gweithredu ystyrlon gan lywodraethau olynol San Steffan.
Daw cyhoeddiad am yr orymdaith ychydig wythnosau ar ôl i Lywodraeth y Deyrnas Gyfunol wrthod unwaith eto drosglwyddo rheolaeth Ystad y Goron i Gymru, er bod pob cyngor yng Nghymru yn ei gefnogi. Byddai rheolaeth dros yr asedau hyn, sydd eisoes wedi'u trosglwyddo i'r Alban, yn caniatáu i Gymru elwa'n uniongyrchol o'i hadnoddau naturiol ei hun.
Mae ffermydd gwynt môr Gwastadeddau'r Rhyl a Gwynt y Môr yn rhan o bortffolio Ystad y Goron. Maent yn cynhyrchu refeniw enfawr, ond mae'r manteision economaidd yn llifo allan o Gymru yn hytrach nag aros i gefnogi swyddi a gwasanaethau lleol. Dylai'r ffermydd gwynt hyn fod yn pweru swyddi yn y gogledd, nid yn creu elw i San Steffan. Hon yw’r enghraifft ddiweddaraf sy’n dangos na all Cymru ddibynnu ar San Steffan i weithredu er ei lles, waeth pa blaid sydd mewn grym.
Gorymdeithio Gyda’n Gilydd dros Annibyniaeth
Dywedodd Geraint Thomas, ar ran AUOBCymru:
Mae’r gorymdeithiau dros annibyniaeth yn dangos hyder cynyddol pobl Cymru. Yn Y Barri gwelsom filoedd ar y strydoedd, ac yn Y Rhyl rydym yn gobeithio gweld miloedd yn rhagor. Mae San Steffan wedi methu ein cymunedau ers cenedlaethau, a dim ond annibyniaeth all roi pŵer i Gymru lunio ei dyfodol ei hun. Mae’r ymgyrch dros annibyniaeth yn perthyn i bawb – teuluoedd, pobl ifanc, cymunedau o bob cwr o’n gwlad – gallwn ni i gyd sefyll gyda’n gilydd i fynnu dyfodol gwell. Rwy’n annog pawb sy’n credu mewn annibyniaeth i ymuno â ni yn Y Rhyl ar 18 Hydref!
Bydd hwn yn ddigwyddiad sy’n addas i deuluoedd gyda chroeso cynnes i bawb, p’un a ydych chi’n gefnogwr brwd o annibyniaeth neu’n chwilfrydig i ddysgu mwy. Mae gorymdeithiau’n dod â phobl ynghyd o bob cwr o Gymru i ddathlu ein cenedl, rhannu syniadau, a dangos cryfder yr ymgyrch dros annibyniaeth a dyfodol gwell i Gymru.
Cliciwch yma am yr holl wybodaeth am Orymdaith Annibyniaeth Y Rhyl.